هل اللي يلبس دشداشة ما يفهم؟ للدكتور - خالد أحمد الشلال . توكم تنتبهون
هذه هي نظرة بعض الوافدين للكويتيين اللي يلبسون دشداشة وهذا موجود على كافة أنواع التعاملات بين الكويتيين وبعض الوافدين
إذا رحت تصلح سيارتك عند الكراج يعطيك سعراً خيالياً ولو انتقلت الى كراج آخر عطاك ربع السعر أي بفارق كبير يقول هذا كويتي عنده فلوس وايد - واجد - وما يهتم. المطاعم بعضها تلقاه يعطيك فاتورة طويلة عريضة وإذا طالب سلطة وحدة يحط لك أربع سلطات ويكرر الطلبات وهكذا والكويتي ما يدقق يقط عليه الكرت أو الكاش ويمشي لأن الكويتيين بعضهم ما يدقق بالفاتورة حتى إذا رد لك الباقي من الفلوس تلقاه ياخذ منها. أيضاً بعض المحلات النسائية تقوم بتغيير السعر عند الكاشير والزبونة ما تدري ترمي الكرت عليه وتمشي بدون مراجعة السعر والفاتورة.. هذه السرقة تتركز في بعض المطاعم خصوصاً لما يرجع لك الباقي لازم ياخذ منه المحاسب ولكن يعتمد على جنسية هذا المحاسب
أنا شخصياً من النوع اللي يدقق على الفاتورة وأحسب الباقي من الفلوس لما يرجعهم لي الكاشير يمكن بعضهم يضحك عليك لما تحسب الباقي
كنت في مقهى في أحد المجمعات التجارية الكبيرة قعدت وطلبت قهوة وماء أعطيته فلوس رجع لي الخردة ناقصين أربعمائة فلس ناديت اللي يابت الخردة سألتها هذا الكاشير جنسيته كذا قالت نعم سير رجعت الخردة ورد لي اللي سرقهم، بعد أسبوع رحت نفس المكان وطلبت الحساب وناديت نفس الكاشير وقلت له رجاء لا تسرق مني شيء رد الردود وسارق دينار طبعاً ناديته وهددته بالشكوى للمدير اعتذر ورد لي العشرة دنانير وما أخذ الحساب أنا طبعاً أخذت العشرة وصارت القهوة ببلاش. أتمنى من إخواني وأخواتي لا تخلون أحد يضحك عليكم خصوصاً البنات راجعوا الحساب لأن بعض الوافدين يعتقدون أن الكويتيين ما يفهمون فأثبتوا لهم أنكم أحسن منهم وتفهمون ومتعلمون أكثر منهم. الله يوفق الجميع. والله ولي التوفيق. ومع السلامة
أخوكم kalshalal@alwatan.com.kw تاريخ النشر 22/12/2009
القسم : حقوق المواطن - الزيارات : [137] - التاريخ : 6/1/2010 - الكاتب : b3
